എന്‍റെ പോലീസ് സ്റ്റേഷന്‍

"എന്‍റെ പോലീസ് സ്റ്റേഷന്‍" പൊതുജനങ്ങള്‍ക്കും പരാതിക്കാര്‍ക്കും ആത്മവിശ്വാസത്തോടെ കടന്നുചെല്ലാന്‍ കഴിയുന്ന സേവനകേന്ദ്രങ്ങളാക്കി പൊലീസ് സ്റ്റേഷനുകളെ മാറ്റുക എന്ന ലക്ഷ്യം മുന്‍നിര്‍ത്തി ആഭ്യന്തര വകുപ്പ് ആവിഷ്കരിച്ച് നടപ്പാക്കുന്ന പദ്ധതിയാണ് എന്‍റെ പോലീസ് സ്റ്റേഷന്‍. ആധുനിക ജനാധിപത്യ സമൂഹത്തിന് അനുയോജ്യമായ വിധത്തില്‍ പ്രൊഫഷണലിസത്തിലൂടെ സാങ്കേതിക വിദ്യ പരമാവധി പ്രയോജനപ്പെടുത്തി പൊലീസിന്‍റെ പ്രവര്‍ത്തനവും പൊതുജനങ്ങള്‍ക്ക് നല്‍കുന്ന സേവനവും പടിപടിയായി മെച്ചപ്പെടുത്തുക എന്നതാണ് ഈ പരിഷ്കരണം കൊണ്ട് ഉദ്ദേശിക്കുന്നത്.

പൗരന്‍റെ അന്തസിനെ പൂര്‍ണ്ണമായും മാനിച്ചുകൊണ്ട് പൊലീസ് സ്റ്റേഷനില്‍ നിന്നും ജനങ്ങള്‍ക്ക് ലഭിക്കേണ്ട സേവനങ്ങള്‍ കാര്യക്ഷമമായി ലഭിക്കുന്നുണ്ടെന്ന് ഉറപ്പുവരുത്തുന്ന പദ്ധതിയാണ് എന്‍റെ പോലീസ് സ്റ്റേഷന്‍. പൊലീസ് സ്റ്റേഷന്‍ പരിസരം വൃത്തിയായി സൂക്ഷിക്കാനും പൊതുജനസൗഹൃദ അന്തരീക്ഷം നിലനിര്‍ത്താനും പൊലീസിന്‍റെ നേട്ടങ്ങളെ പിറകോട്ടടിക്കുന്ന വിധത്തിലുള്ള മൂന്നാം മുറ പോലുള്ള അപരിഷ്കൃത നിയമവിരുദ്ധ പ്രവര്‍ത്തനങ്ങള്‍ ഇല്ലാതാക്കി ആധുനിക ജനാധിപത്യത്തിന്‍റെ ഉത്തമമാതൃകയാക്കി നമ്മുടെ പൊലീസ് സ്റ്റേഷനുകളെ മാറ്റാനും ആഭ്യന്തര വകുപ്പ് ഇതിലൂടെ ലക്ഷ്യമിടുന്നു.

പരാതികളുമായി എത്തുന്നവര്‍ക്കായി പ്രത്യേക പരാതി ഹെല്‍പ്പ് ഡെസ്ക്, വനിത ഹെല്‍പ്പ് ഡെസ്ക്, കുട്ടികളുടെ ഹെല്‍പ്പ് ഡെസ്ക്, സീനിയര്‍ സിറ്റിസണ്‍ ഹെല്‍പ്പ് ഡെസ്ക്, ട്രാന്‍സ്ജെന്‍ഡര്‍ ഹെല്‍പ്പ് ഡെസ്ക്, ഭിന്നശേഷിക്കാര്‍ക്കായുള്ള ഹെല്‍പ്പ് ഡെസ്ക്, സൈബര്‍ ക്രൈം ഹെല്‍പ്പ് ഡെസ്ക്, നിയമസഹായ ഹെല്‍പ്പ് ഡെസ്ക്, വിവിധ അപേക്ഷകള്‍, ഓണ്‍ലൈന്‍ സേവനങ്ങള്‍, വിവരാവകാശ നിയമം, എഫ്.ഐ.ആര്‍ പകര്‍പ്പ് തുടങ്ങിയ വിവിധ സേവനങ്ങള്‍ "എന്‍റെ പോലീസ് സ്റ്റേഷന്‍" പദ്ധതിയുടെ ഭാഗമായി പോലീസ് സ്റ്റേഷനുകളില്‍ ഒരുക്കും. ഈ പദ്ധതിയിലൂടെ കേരളത്തിലെ പൊലീസ് സംവിധാനത്തെ ജനങ്ങളുടെ സ്വന്തം സംവിധാനമാക്കിമാറ്റുകയും ജനങ്ങള്‍ക്ക് കൂടുതല്‍ മെച്ചപ്പെട്ട സേവനം ലഭ്യമാക്കുകയും ചെയ്യും.

പ്രധാന സവിശേഷതകള്‍

• പൊലീസ് സ്റ്റേഷനിലെത്തുന്ന ഓരോ വ്യക്തിയുടെയും അന്തസിനെ മാനിച്ചുകൊണ്ട് മെച്ചപ്പെട്ടതും സമയബന്ധിതവുമായ സേവനങ്ങള്‍ നല്‍കും.
• വിവിധ ആവശ്യങ്ങള്‍ക്കായി പൊലീസ് സ്റ്റേഷനുകളെ സമീപിക്കുന്ന പൗരന്‍റെ സംതൃപ്തി ഉറപ്പുവരുത്തുന്നു.
• കസ്റ്റഡി മരണങ്ങള്‍, കസ്റ്റഡി മര്‍ദ്ദനങ്ങള്‍ എന്നിവ പൂര്‍ണ്ണമായും ഇല്ലാതാക്കും.
• പുതിയ എസ്.എച്ച്.ഒമാര്‍ക്കും സ്റ്റേഷനുകളിലെ എല്ലാ ഉദ്യോഗസ്ഥര്‍ക്കും ഘട്ടം ഘട്ടമായി പരിശീലനം നല്‍കും.
• സൂപ്പര്‍വൈസറി ഉദ്യോഗസ്ഥരായ ഇന്‍സ്പെക്ടര്‍മാര്‍ക്കും ഡി.വൈ.എസ്.പിമാര്‍ക്കും പരിശീലനം നല്‍കും.
• സൂപ്പര്‍വൈസറി ഉദ്യോഗസ്ഥര്‍ സാങ്കേതിക രംഗത്തെ മാറ്റങ്ങള്‍ പഠിക്കുകയും അതിലൂടെ കൂടുതല്‍ മെച്ചപ്പെട്ട സേവനങ്ങള്‍ ഉറപ്പുവരുത്തുകയും ചെയ്യും.
• സംസ്ഥാനത്ത് ജനമൈത്രി സുരക്ഷാ പദ്ധതി കൂടുതല്‍ കാര്യക്ഷമമാക്കും.
• റേഞ്ച് ഡി.ഐ.ജിമാര്‍ തങ്ങളുടെ ചുമതലയിലുള്ള ഓരോ സ്റ്റേഷനില്‍ നിന്നും മാസം തോറും ഫീഡ് ബാക്ക് ശേഖരിക്കുകയും ഇത് വിലയിരുത്തി വേണ്ട നിര്‍ദേശങ്ങള്‍ നല്‍കുകയും ചെയ്യും.