കേരള പോലീസ് സൈബർ ഡിവിഷന്റെ സംരംഭം

പദ്ധതിയെക്കുറിച്ച്

കേരളത്തെ സൈബർ ഭീഷണികളെ ഫലപ്രദമായി നേരിടാൻ പ്രാപ്തമായ സംസ്ഥാനമാക്കി മാറ്റുക എന്ന ലക്ഷ്യത്തോടെ കേരള പോലീസ് സൈബർ ഡിവിഷൻ ആവിഷ്കരിച്ച ജനകീയ സൈബർ സുരക്ഷാ സംരംഭമാണ് ക്ലിക്ക് (CLICK-Community Led Initiative for Cyber Resilient Keralam).

കേരള സർക്കാർ ആഭ്യന്തര വകുപ്പിന്റെ നേതൃത്വത്തിൽ നടപ്പിലാക്കുന്ന ഈ സംരംഭം 2026 ഒക്ടോബർ 31-ന് ഔദ്യോഗികമായി ഉദ്ഘാടനം ചെയ്തു. സൈബർ കുറ്റകൃത്യങ്ങൾ തടയുക, പൊതുജനങ്ങളിൽ ഡിജിറ്റൽ സുരക്ഷാ അവബോധം വളർത്തുക, സമൂഹത്തിന്റെ സജീവ പങ്കാളിത്തത്തിലൂടെ 2027-ഓടെ സൈബർ പ്രതിരോധശേഷിയുള്ള കേരളം സൃഷ്ടിക്കുക എന്നിവയാണ് പദ്ധതിയുടെ പ്രധാന ലക്ഷ്യങ്ങൾ.

പൊതുജനങ്ങൾ, വിദ്യാഭ്യാസ സ്ഥാപനങ്ങൾ, വ്യവസായ മേഖല, സർക്കാർ വകുപ്പുകൾ, സാമൂഹിക സംഘടനകൾ, യുവജന കൂട്ടായ്മകൾ എന്നിവയെ ഒരുമിപ്പിച്ചുകൊണ്ട് സൈബർ സുരക്ഷയിൽ കൂട്ടായ ഉത്തരവാദിത്തവും പങ്കാളിത്തവും ഉറപ്പാക്കുന്നതിനാണ് ക്ലിക്ക് മുൻഗണന നൽകുന്നത്.

ദർശനം

2027-ഓടെ സൈബർ പ്രതിരോധശേഷിയുള്ള കേരളം സൃഷ്ടിക്കുക. സൈബർ ഭീഷണികൾ തിരിച്ചറിയാനും പ്രതിരോധിക്കാനും സൈബർ ആക്രമണങ്ങളുടെ ആഘാതം പരമാവധി കുറയ്ക്കാനും അവയിൽ നിന്ന് വേഗത്തിൽ കരകയറാനും ഓരോ പൗരനെയും സ്ഥാപനത്തെയും സമൂഹത്തെയും പ്രാപ്തരാക്കുക.

ദൗത്യം

സൈബർ സുരക്ഷാ ബോധവൽക്കരണം, പരിശീലനം, ശേഷി വികസനം, സ്ഥാപനതല സഹകരണം, ജനകീയ പങ്കാളിത്തം എന്നിവയിലൂടെ സുരക്ഷിതവും ഉത്തരവാദിത്തപൂർണവുമായ ഡിജിറ്റൽ സംസ്കാരം വളർത്തിയെടുക്കുക. സൈബർ സുരക്ഷ സമൂഹത്തിന്റെ കൂട്ടായ ഉത്തരവാദിത്തമാണെന്ന ബോധം എല്ലാവരിലേക്കും എത്തിക്കുക.

പ്രധാന ലക്ഷ്യങ്ങൾ

• സൈബർ കുറ്റകൃത്യങ്ങൾ തടയൽ: ഓൺലൈൻ സാമ്പത്തിക തട്ടിപ്പുകൾ, വ്യക്തിവിവര മോഷണം, ഫിഷിംഗ്, മറ്റ് സൈബർ ഭീഷണികൾ എന്നിവയെക്കുറിച്ച് പൊതുജനങ്ങളിൽ അവബോധം സൃഷ്ടിക്കുകയും പ്രതിരോധ നടപടികൾ പ്രോത്സാഹിപ്പിക്കുകയും ചെയ്യുക.
• ഡിജിറ്റൽ സുരക്ഷാ അവബോധം: ഡിജിറ്റൽ സാങ്കേതികവിദ്യകളും ഓൺലൈൻ സേവനങ്ങളും സുരക്ഷിതമായും ഉത്തരവാദിത്തത്തോടെയും ഉപയോഗിക്കുന്നതിന് ആവശ്യമായ അറിവും പ്രായോഗിക കഴിവുകളും പൊതുജനങ്ങൾക്ക് ലഭ്യമാക്കുക.
• ജനകീയ പങ്കാളിത്തം: സൈബർ സുരക്ഷാ പ്രവർത്തനങ്ങളിൽ വിദ്യാർഥികൾ, അധ്യാപകർ, യുവജനങ്ങൾ, സാമൂഹിക സംഘടനകൾ, വ്യവസായ സ്ഥാപനങ്ങൾ, പൊതുജനങ്ങൾ എന്നിവരുടെ സജീവ പങ്കാളിത്തം ഉറപ്പാക്കുക.
• സൈബർ പ്രതിരോധശേഷി വർധിപ്പിക്കൽ: സൈബർ ഭീഷണികൾ മുൻകൂട്ടി തിരിച്ചറിയാനും ആക്രമണങ്ങളെ നേരിടാനും അവയുടെ ആഘാതം കുറയ്ക്കാനും സാധാരണ പ്രവർത്തനങ്ങളിലേക്ക് വേഗത്തിൽ മടങ്ങിവരാനും വ്യക്തികളെയും സ്ഥാപനങ്ങളെയും പ്രാപ്തരാക്കുക.
• പരിശീലനവും ശേഷി വികസനവും: സൈബർ സുരക്ഷാ വിദ്യാഭ്യാസം, പരിശീലന പരിപാടികൾ, ശിൽപ്പശാലകൾ, അറിവ് പങ്കുവയ്ക്കൽ പ്രവർത്തനങ്ങൾ എന്നിവ പ്രോത്സാഹിപ്പിക്കുക.
• സൈബർ കുറ്റകൃത്യങ്ങളുടെ റിപ്പോർട്ടിംഗ്: സൈബർ കുറ്റകൃത്യങ്ങൾക്ക് ഇരയാകുന്നവർ ഭയമോ സാമൂഹിക അപകീർത്തിയെക്കുറിച്ചുള്ള ആശങ്കയോ കൂടാതെ പരാതിപ്പെടുന്നതിനും സമയബന്ധിതമായി സഹായം തേടുന്നതിനും പ്രോത്സാഹനം നൽകുക.
• സ്ഥാപനതല സഹകരണം: നിയമപാലന ഏജൻസികൾ, വിദ്യാഭ്യാസ സ്ഥാപനങ്ങൾ, വ്യവസായ മേഖല, സാങ്കേതിക വിദഗ്ധർ, സാമൂഹിക സംഘടനകൾ എന്നിവ തമ്മിലുള്ള സഹകരണം ശക്തിപ്പെടുത്തുക.

പ്രധാന പ്രവർത്തന മേഖലകൾ

1. സൈബർ സുരക്ഷാ ബോധവൽക്കരണവും വിദ്യാഭ്യാസവും: സൈബർ ഭീഷണികൾ, ഓൺലൈൻ തട്ടിപ്പുകൾ, വ്യക്തിവിവര സംരക്ഷണം, സുരക്ഷിതമായ ഇന്റർനെറ്റ് ഉപയോഗം എന്നിവയെക്കുറിച്ച് പൊതുജനങ്ങളിൽ അവബോധം വളർത്തുന്നതിനായി ബോധവൽക്കരണ പരിപാടികൾ, വിദ്യാഭ്യാസ പ്രവർത്തനങ്ങൾ, സാമൂഹിക പ്രചാരണങ്ങൾ എന്നിവ സംഘടിപ്പിക്കുക.

2. ജനപങ്കാളിത്തത്തോടെയുള്ള സൈബർ കുറ്റകൃത്യ പ്രതിരോധം: സൈബർ അപകടസാധ്യതകൾ തിരിച്ചറിയുന്നതിനും പ്രതിരോധ മാർഗങ്ങൾ പ്രചരിപ്പിക്കുന്നതിനും പ്രാദേശികതല സൈബർ സുരക്ഷാ പ്രവർത്തനങ്ങളിൽ പങ്കാളികളാകുന്നതിനും പൊതുജനങ്ങളെ പ്രോത്സാഹിപ്പിക്കുക.

3. ഓൺലൈൻ സാമ്പത്തിക തട്ടിപ്പുകൾക്കെതിരായ പ്രതിരോധം: ഓൺലൈൻ സാമ്പത്തിക തട്ടിപ്പുകൾ, വ്യാജ നിക്ഷേപ പദ്ധതികൾ, ഫിഷിംഗ്, ആൾമാറാട്ടം, സോഷ്യൽ എൻജിനീയറിംഗ് തുടങ്ങിയ തട്ടിപ്പു രീതികളെക്കുറിച്ച് പൊതുജനങ്ങൾക്ക് അവബോധം നൽകുകയും മുൻകരുതൽ നടപടികൾ പ്രോത്സാഹിപ്പിക്കുകയും ചെയ്യുക.

4. സൈബർ സുരക്ഷാ ശേഷി വികസനം: വിദ്യാർഥികൾ, അധ്യാപകർ, ഉദ്യോഗസ്ഥർ, വിവിധ മേഖലകളിലെ പ്രൊഫഷണലുകൾ, സാമൂഹിക സന്നദ്ധ പ്രവർത്തകർ എന്നിവർക്ക് പരിശീലനവും നൈപുണ്യ വികസന പരിപാടികളും ലഭ്യമാക്കുന്നതിലൂടെ സൈബർ സുരക്ഷാ അറിവും പ്രതിരോധശേഷിയും വർധിപ്പിക്കുക.

5. സൈബർ കുറ്റകൃത്യ റിപ്പോർട്ടിംഗും ഇരകൾക്കുള്ള സഹായവും: സൈബർ കുറ്റകൃത്യങ്ങൾ സമയബന്ധിതമായി റിപ്പോർട്ട് ചെയ്യേണ്ടതിന്റെ പ്രാധാന്യം പൊതുജനങ്ങളിലെത്തിക്കുക. പരാതിപ്പെടുന്നതിനുള്ള ഔദ്യോഗിക സംവിധാനങ്ങളെക്കുറിച്ച് അവബോധം സൃഷ്ടിക്കുകയും ഇരകൾക്ക് ഭയമോ മടിയോ കൂടാതെ സഹായം തേടാൻ പ്രോത്സാഹനം നൽകുകയും ചെയ്യുക.

6. വിദ്യാഭ്യാസ&ndashവ്യവസായ സാമൂഹിക മേഖലകളിലെ സഹകരണം: വിദ്യാഭ്യാസ സ്ഥാപനങ്ങൾ, സാങ്കേതിക വിദഗ്ധർ, വ്യവസായ സ്ഥാപനങ്ങൾ, സർക്കാർ ഏജൻസികൾ, സാമൂഹിക സംഘടനകൾ എന്നിവയുടെ സഹകരണത്തോടെ സുസ്ഥിരമായ സൈബർ സുരക്ഷാ ബോധവൽക്കരണവും പ്രതിരോധ പ്രവർത്തനങ്ങളും പ്രോത്സാഹിപ്പിക്കുക.

സൈബർ പ്രതിരോധശേഷിയുള്ള കേരളത്തിലേക്ക്

സൈബർ സുരക്ഷ എന്നത് സൈബർ ആക്രമണങ്ങൾ തടയുന്നതിൽ മാത്രം ഒതുങ്ങുന്നതല്ല. ഭീഷണികൾ മുൻകൂട്ടി തിരിച്ചറിയുക, ആക്രമണങ്ങളുടെ ആഘാതം പരമാവധി കുറയ്ക്കുക, അടിയന്തര സാഹചര്യങ്ങളിൽ ഫലപ്രദമായി പ്രതികരിക്കുക, സാധാരണ പ്രവർത്തനങ്ങൾ വേഗത്തിൽ പുനഃസ്ഥാപിക്കുക എന്നിവയും സൈബർ പ്രതിരോധശേഷിയുടെ ഭാഗമാണ്.

ഡിജിറ്റൽ ലോകത്ത് എല്ലാ സൈബർ ഭീഷണികളിൽ നിന്നും പൂർണമായ സംരക്ഷണം ഉറപ്പാക്കുക പ്രായോഗികമല്ലെന്ന യാഥാർഥ്യം ഉൾക്കൊണ്ടാണ് ക്ലിക്ക് പദ്ധതി രൂപകൽപ്പന ചെയ്തിരിക്കുന്നത്. അതിനാൽ തുടർച്ചയായ ബോധവൽക്കരണം, ജാഗ്രത, മുൻകരുതൽ, തയ്യാറെടുപ്പ്, കൂട്ടായ പ്രവർത്തനം എന്നിവയ്ക്ക് പദ്ധതി പ്രത്യേക പ്രാധാന്യം നൽകുന്നു.

കേരള പോലീസും പൊതുസമൂഹവും കൈകോർക്കുന്നതിലൂടെ സുരക്ഷിതമായ ഡിജിറ്റൽ അന്തരീക്ഷവും സുസ്ഥിരമായ സൈബർ സുരക്ഷാ സംസ്കാരവും വളർത്തിയെടുക്കുകയാണ് ഈ സംരംഭത്തിന്റെ ലക്ഷ്യം.

ഞങ്ങളുടെ പ്രതിബദ്ധത

സൈബർ സുരക്ഷയെ സമൂഹത്തിലെ എല്ലാ വിഭാഗങ്ങൾക്കും പ്രാപ്യമാക്കുകയും പൊതുജന പങ്കാളിത്തത്തിലൂടെ ശക്തിപ്പെടുത്തുകയും ചെയ്യുക എന്ന കേരള പോലീസ് സൈബർ ഡിവിഷന്റെ പ്രതിബദ്ധതയുടെ ഭാഗമാണ് ക്ലിക്ക്.

അറിവ് പങ്കുവയ്ക്കൽ, ഉത്തരവാദിത്തപൂർണമായ ഡിജിറ്റൽ പെരുമാറ്റം, കൂട്ടായ ജാഗ്രത, സജീവ ജനപങ്കാളിത്തം എന്നിവയിലൂടെ എല്ലാവർക്കും സുരക്ഷിതമായ ഡിജിറ്റൽ കേരളം സൃഷ്ടിക്കുകയാണ് പദ്ധതിയുടെ ലക്ഷ്യം.

2027-ഓടെ സൈബർ പ്രതിരോധശേഷിയുള്ള കേരളം നമുക്ക് ഒരുമിച്ച് സാക്ഷാത്കരിക്കാം.

അറിവിലൂടെ അവബോധം, ജാഗ്രതയിലൂടെ പ്രതിരോധം.

സൈബർ കുറ്റകൃത്യങ്ങൾ റിപ്പോർട്ട് ചെയ്യാം

സൈബർ കുറ്റകൃത്യങ്ങൾക്ക് ഇരയാകുന്നവർ എത്രയും വേഗം ഔദ്യോഗിക സംവിധാനങ്ങളിലൂടെ പരാതി നൽകുക.

ദേശീയ സൈബർ ക്രൈം ഹെൽപ്പ്ലൈൻ: 1930

ദേശീയ സൈബർ ക്രൈം റിപ്പോർട്ടിംഗ് പോർട്ടൽ: https://cybercrime.gov.in